SHILLONG: Bobil dakgipa dakgipa dolrang, Ma·mong sorkari baksa tom·tomanina agangrikna nangnikode Hynniewtrap National Council (HNLC) bobil dolni palo aganchakdilna gita gitcham Cabinet Minister aro BJP a·gipi dilgipa, AL Hek an·tangko ku·rachaka
Bang·a changrangna batanggimin salrango bobil dakgipa dolko nama ramaona an·pilatna chanchigrikna jotton ka·aha indiba pilak jotton ka·anirang da·alonaba be·en pilna man·kujaenga, Hek aganaha.
Niam gri kamrango bobil dolni jakmarang dongkuenganio tom·tomanina agangrikna a·bachengna uni chanchianiko niate sikkimpilengama ine sing·anina, ‘‘Angni jotton ka·anina agana sikkimja aro HNLC Ma·mong baksa uamangni agangrikna nangnikenga ong·ode uamangni palo agandilna anga taria,’’ ine Hek aganaha.
Bobil dol re·anggipa bilsisao a·doko changgni boma gopretataha unagreba bang·a politician-rangna tangka dabiani lekkarangko sokataha.
Ru·utgija salo bobil dol, NPP-na puonjachina manderangko ka·mik kenatani bidingo, jeba political dolna puonchina ba puonjachina darangkoba draana man·ja aro a·jolni ba a·songni ba jakgitelgipa candidate-rangna puongen ba puonjawa songpanggiparangni chanchianisa ong·aia.
Bobil dakgipa dolni sakanti sakprak nama ramaona an·pilako uni nangnikako janaptaie, ua national executive Committee-ni membor ong·aonin BJP-ni national executive Committee-o HNLC baksa tom·tomanina agangrikani mamlako man·chape a·dokni dingtang dingtang mamlarangko ua janapgen ine ua aganaha.
Meghalaya-ko bobil dakgipa doloni jakgitelgipa a·dok ong·ako an·tangni nangnikengako janape, a·doko darangkoba jat baseako aro mitchinikgrike dakako nangnikja, Meghalaya a·dokko sakantina nambatsranggipa biap dakna uni sikaniko ua aganaha.
Ia bilsini August jao police baksa gogrikao so·otako man·gipa HNLC-ni gitcham dilgipa Cheristerfield Thangkhiew-ni nokdangna kakket bichalko gitcham Cabinet Cabinet Minister dabiaha.
“Uko goe so·otani a·sel chingni songsalo ra·chaktoani ong·jaha,’’ ua agandapaha.
