SHILLONG: Pilak kamrangon daito ra·pagiparang ong·genchimoba, High Level Committee (HLC)-ni report-ko uamangnaba u·iatpachina gita mol·molaniko A·dok Sorkarini knachakjani gimin Harijan Panachayat Committee, suk ong·gijaniko parakaha.
“ Chingaba iano daito ra·pagiparang ong·ani gimin HLC-ni copy-ko on·china chinga RTI ka·aha indiba a·dok sorkari chingna mamingkoba aganchakjaenga” ine HPC Secretary, Gurjit Singh Sonibaro aganaha.
Gipin gipin dolrangni dabienga gitan sorkari ia lekkarangko jinmana parakna nanga, unbaksana a·a on·ani bidingo Shillong Municipal Board, Mylliem-ni Syiem aro Urban Affairs department dolgittamni ku·chakgrike soi ka·gipani copy-ko mangba chinga on·jaha ineba ua suk ong·gijaniko parakaha.
Uamang ia copy-rangko Court-o mesokna gita nangani gimin uamangna ia copy-rangko nangchongmota ineba ua aganaha.
Harijan Colony-o donggiparangko gipin biapona apjitatna am·ani gimin HPC, High Court aroba Supreme Court-o minggni badi ka·aha ineba nikatna man·aha.
Da·omitingo Colony-o donggipa Permanent municipal employee-rangko, rikgimin quarter-rango apjitangchina gita HPC, ia ja a·bachengao de·e mesokahachim.
Iana agreba, Bishop Cotton Road-o donggipa Shillong Municipal Board office-ko gitcham MBDA office-ona apjitangchina gitaba Committee de·e mesokahachim.
Harijan Panchayat Committee (HPC), Meghalaya sorkarni High-Level Committee (HLC)-ni report-koba raken jeaha aro dakgrikchakna gita tariaha.
Meghalaya High Court-ni on·gipa status quo-ko Sorkarini pe·ani giminba HPC sorkariko matnangaha, jeon HC-ni order-ni kosako dakgriken ine Meghalaya sorkari krengskaenga.
