TURA: Re·baenggipa October 30 tariko Meghalaya-ni ge·gittam assembly seat-rangna by-election-rangko ong·atengon, political party-rang uamangni candidate-tangtangna campaign ka·anirangko a·bachengtokengaha.
Indake Meghalaya Chief Minister Conrad K Sangma, Rajabala seat-na suaatenggipa uamangni NPP candidate Abdus Saleh-na Sonibaro campaign ka·chakeaha aro constituency-na namroro-silroroaniko ra·bana gita ku·rachakaha.
NPP candidate Abdus Saleh-na vote on·china gita manderangko didian baksa, Mukul Sangma aro Congress sorkarini kam ka·ani aroba uni sorkarini chu·sokatgiminrangko chief minister tosusaenba manderangna aganaha.
“Jeje kamrangkon gitcham sorkari, bilsi chikking ong·nasipile sason ka·oba chu·sokatangna man·jachim, uarangko chingni sorkari bilsi gittamni gisepon chu·sokataha. Chinga bang·a ramarangko tariaha, nokrik nokdakanirangko aro medical centre-rangko rikaha” ine chief minister a·kange aganan baksa, Garo Hills-ni plain belt-o donggipa manderangna Mukul Sangma-ni gitcham sorkari chu·sokate on·na bilsokjaha ine matnange aganaha.
“A·bri jolo aro a·kawe jolo donggipa manderang pilakkon chinga apsan mande chana’’ ineba chief minister aganaha.
Saleh aro Congress candidate Hasina Yasmin Mondol-na agreba MDA srokari baksa bakrimgipa mongsonggipa dol UDP-ni candidate aro da·oni GHADC MDC Ashahel D Shira-ba Rajabala seat-na mongsonggipa susagipa ong·enga, uani bidingode chief minister mamingkoba aganjahachim.
Congress party-de dilgipa gri ong·engjok, jeon a·song gimikon party dilgiparangan party-ko wate kattokengjok ineba chief minister, Congress-ni kosako aganaha.
A·gipi Congress dilgipa gitcham chief minister Mukul Sangmaba party-kon watna nidingengjok, jean re·anggipa somoio Kolkata-ona re·angenba all India Trinamool Congress dilgipa aro West Bengal Chief Minister Mamata Banerjee-ko grongpilaha ineba chief minister aganaha.
Vincent Pala-ko MPCC president songaonin a·doko Congress party dilgiparangni gisepo meligrikgijanirang batroroengaha ineba chief minister sakki on·e aganaha.
