SHILLONG: Meghalaya a·dokni gitcham chief minister aro Congress Legislature Party (CLP)-ni dilgipa Mukul Sangma-ni bidingo da·o dipet Meghalaya a·doko Congress dolni dilgiparang name tik ka·na man·tokkujaengon, CLP-ni dilgipako seokanide Congress MLA-rangni jakosa ong·aignok ine Meghalaya Pradesh Congress Committee (MPCC)-ni president Vincent H Pala parakataha.
Congress dolni adita dilgiparang aro MLA-rang, CLP-ni gital dilgipako seokchina dabitokengoba Congress dolni Charles Pyngrope, Ampareen Lyngdoh aro uandakgipa gipin ja·delgimin dilgiparangde Mukul Sangma-an CLP-ni dilgipa ong·angkugen ine a·kangtokskaengachim.
Indake ong·engon, CLP-ni gital dilgipako seokchina mitam Congress membor-rangni aro MLA-rangni dabianiko agan-golpoanisan ong·aia ine Pala a·kangatahaoba, CLP-ni gital dilgipako seokna nangbebegenchimode Congress MLA-rangnan chu·gimik bilko on·gen ine parakataha.
“Angni kamde a·doko Congress dolko chalaianisan ong·aia aro MLA-rang an·tangtangan CLP-ni gital dilgipako seokna man·aigen. Uamangni an·tangtangni nangnikaniko dakchina anga chu·gimik bilko uamangna on·aigen,” ine Pala aganaha.
Congress MLA-rangni seachi badi ka·aniko ua da·o dipet man·soa dongkuja ineba MPCC-ni president parakataha.
“CLP dilgipani kamo mitam membor-rang kusi ong·jaengnaba gnang indiba da·o dipet anga uamangoniko seachi badi ka·aniko man·soa dongkuja,” ine ua aganaha.
Congress dolko bak dakna jotton ka·enga ine matnangenba, Congress dolni mitam MLA-rang, Mukul Sangma-ko CLP-ni dilgipa ong·aoniko ra·galchina dabiahachim ine nikna man·a.
