TURA: Re·anggipa Sombar attamchibara, West Garo Hills a·jani Phulbari jolo donggipa Bholarbhita-oni matchu badinggipa mande saksako ma·sina man·gijagipa manderang, Dadenggre sub-division-ni Damal A·sim jolo chadrapenba, uni tangka paisarangko ra·e kataha ine kobor on·aha.
Koborko on·ani gitade, Bholarbhita songni Shahazamal Sk ba Elu minggipa mande saksa, matchu brena ine adita tangka paisarangko ra·e ua biapona re·angahachim indiba uko Damal A·sim jolo donggipa Rongmasugre songo, ma·sina man·gijagipa manderang chadrape, uni tangka paisarangko ra·e kataha.
Ia manderang uko matsramgipa bosturangchi chadrapaha aro uandaken ua bilongbee saknaanirangko man·ahani gimin uko Dadenggre hospital-ona rimangon doctor-rang uko Tura-ona watatskaaha.
Ja·mano ia mandeko nambate sanna gita Guwahati-ona ra·angskaaha ineba kobor on·aha.
Police-rangni u·iatani gitade, ia a·selni bidingo FIR-ko ka·e am·sandianirangko dakna a·bachengengaha indiba da·o dipet darangba sakkiko on·na police-rangona re·baa dongkujaenga.
Ia mande nampile police-rangna chu·gimikko agane on·na man·ahaon police-rang, ia a·selni bidingo talbate ma·sina man·gen ineba parakataha.
