Shillong: Khasi Hills Autonomous District Council (KHADC)-ni Executive Committee, council-ni jurisdiction-ni ning·o ga·akgipa dingtang dingtang bajar-antirango plastic jakkalaniko dongtongna ‘no plastic zone’-ko Mongolbar salo parakataha.
“Council-ni jurisdiction-o ga·akgipa gimik bajar-o plastic jakkalako cham-pengna gita no plastic zone-ko parakataha. Ia niamko mikkangchi Iewduh-oba ra·gatgen. Maina bang·a manderango-nikon badi ka·anirangko man·seonga, ine KHADC-ni Chief Executive Member (CEM), Titosstarwell Chyne aganaha.
Uandake Iewduh bajaro donggipa gimik dokan dakgiparangko plastic jakkaljachini mikrakataha.
Indake ong·engon dokano plastic jakkalako nirokna gita KHADC CEM, Council-ni Enforcement personnel-ko Hima Mylliem-ni police dolrang baksa watna tik ka·aha.
