TURA: Bristibar pringwalni 2:00 bajimango Tura-oni Shillong-ona re·angenggipa bus gariko, Guwahati songjinma sokna skang Mirza jolo, ma·sina man·gijagipa manderang ro·ong goe chadrapsoaha aro ro·ong goanio garini mikkango donggipa glass be·prue, gario songreangenggipa mande saksa aro garini handyman-ba adita saknaanirangko man·aha.
Ia bus gariara AS-01H 2544 Network Travels ong·achim aro ua somoio ia bus gari, Guwahati airport samba jolo donggipa Mirza-ko napangengachim.
Mirza gita re·angenggipa bus gariko rakbee ro·ong gosoahani a·sel ia garini mikkango donggipa glass be·prue, garini cabin-o songreangenggipa mande saksa aro uni sambao asongenggipa garini handyman-ba adita saknaanirangko man·aha.
A·sel ong·ani ja·mano ia bus gariko saltimgipa, ta·rake ua biaponi sale katangaha aro ja·mano Mirza police station-ona re·ange badi ka·eaha. Bakan police aro ambulance ua biapona re·baee saknaa man·gipa manderangko sanna gita Mirza hospital-ona ra·angaha.
Adita salrangna skangsan, Tura-oni Shillong-ona re·angenggipa MTC bus gariba Nongchram-o donggipa Ringdi chibimaona ga·akonange a·sel ong·ahachim aro ia a·sel ong·anio sakdok manderang so·otako man·an baksana bang·bea manderang saknaanirangko man·na nangahachim.
