SHILLONG: Gitcham Home Minister aro Congress-ni a·gipi dilgipa HDR Lyngdoh-ni National People’s Party (NPP)-ko a·songni gipin bakrango party-ni ja·pangko baridapatna a·dokni resource ba gam-jinko jakkalenga ine matnanganina NPP-ni State President WR Kharlukhi, Congress party-ko a·doko cha·bokaniko kamko ka·batgipa ong·e ine matnangatskaha.
Congress party baksa maming sakki aro agana nangchongmotgipa kattarangan dongja uni giminsa uamang ong·gija kattarangko agane roenga ine Kharlukhi, Sonibar salo kobor ra·timgiparangna aganaha.
Congress-ni dilgipa, NPP-ko gipin a·dokrango party-ko bilakatna a·dokni gam-jinrangko jakkalenga ine matnanganina Kharlukhi, aganchakatskaha.
NPP baksa budget account donga, NPP a·dokni gam-jinko party-ni namgnina jakkalenga ine sakki dongchongmota ong·ode Congresss, Court-ona re·angna man·gen. Congress, uamangni somoio adita bang·en a·dokni manderangko cha·bokaha. Bilsi 1983-o Jowai Water supply scheme-koba cha·bokaha. Iasan ong·aija Health department, Power department-rangoba cha·bokaha, ine Kharlukhi agandapaha.
“A·dokko man·ani bilsi 50 gapnasiengjok, ian skanggipa changna CBI, Minister-ni kosako chargesheet-o segataha, aro uaba chingni ong·ja Congress-ni Minister ong·a. NPP, bilsi 3-ni gisepo a·dokna dangdike on·anirangko talen mesokna jotton ka·a. Congress-de cha·bokanio skanggipa ong·a, ine Kharlukhi aganaha.
