SHILLONG: Meghalaya a·dokni gitcham chief minister aro Congress dolni dilgipa Mukul Sangma, National People’s Party (NPP)-ko Congress baksa nangrime sorkari rikchina nangnikachim ine a·dokni Deputy Chief Minister aro NPP-ni dilgipa Prestone Tynsong parakataha.
Tynsong-ni parakatani gitade, batanggimin bilsirango ong·anggimin obostarangko guale apsan nangrime sorkariko rikna gita Mukul Sangma, uko aganahachim indiba ua Congress baksa nangrime sorkariko rikna jechakaha.
By-election-na campaign ka·engmiting somoio Tynsong, ia kattarangko jinmana parakataha.
A·dokni Deputy Chief Minister aro NPP-ni dilgipa Prestone Tynsong-ba 2017 bilsiona kingkingde Congress dolni memboran ong·achim indiba 2018 bilsini Assembly election-na skang ua NPP-o napskaahachim.
“Angni Congress doloni ong·katani gimin Mukul angko ka·o nangahachim indiba adita salrangna skang ua angko gronge NPP-ko Congress baksa nangrime sorkariko rikna gita didiahachim. Indake ong·genchimoba anga uni nangnikaniko jechakaha,” ine Tynsong aganaha.
Meghalaya a·doko pilak ong·gija kamrangko Secretariat-ni official-rangan ka·dilenga ine aganahani gimin ua Meghalaya Pradesh Congress Committee (MPCC)-ni president Vincent Pala-koba jegalataha. A·dokni namgnina kamrangko rake ka·enggipa civil service official-rangni kosako iandakgipa kattarangko agananiara namen kragijani ong·aha ineba Tynsong parakataha.
Petrol aro diesel-ni damrang tang·doenganina sorkariko dos galengani giminba a·dokni Deputy Chief Minister, Congress dolko jegalataha.
Tynsong-ni aganani gitade, Assam-o petrol-ni kajinako 32.66 percent aro diesel-ni kajinako 23.66 percent ra·engon, Meghalaya a·dokode petrol-ni kajinako 20 percent aro diesel-ni kajinako 12 percent-san ra·engachim.
“Salgro salaram a·dokrango Meghalaya a·dokan petrol aro diesel-ni dam komibatgipa ong·enga,” ine Tynsong parakataha.
