TURA: Jengjal-o Seventh-Day Adventist (SDA) Church-ni chalaienggipa Garo Hills Adventist Nursing Home-ni bidingo social media-rango ong·gija report-rangko on·e manderangko dilsretengani gimin SDA Church-ni gita ia nursing home-ko chalaiani bidingo talataniko on·angaha.

SDA Church-ni talataniko on·angani gitade, Jengjalo palang ge·chibonga donggipa Nursing Home-ko SDA Church, 2018 bilsionin a·bachenge bang·a sana bananio namgnirangko Garo Hills gimikna aro gipin biaprangoni manderangnaba on·engachim. Ia 2021 bilsini July jao Meghalaya sorkarini National Health Mission (NHM), tender notice-ko on·anio gipin dolrang baksana PHC Jengjal-o Public Private Partnership Mode-o pangchake sana bananiko dakna man·na gita SDA Church-naba tender-ko on·aha.

“Meghalaya sorkari da·o dongenggipa Jengjal-ni PHC-ko Sub-Divisional Hospital-ona (SDH) ra·doe sorkarini gipin hospital-rang gita apsan Garo Hills-ni manderangna dingtangmancha nambata indin sana bananiko on·na miksonganiko dakaha. Nambata sana bananiko dakna am·sandie nianio pangchake chinga tender-ko galanio seokaniko man·aha. Ia agreement bilsi 5 (bonga)-nasan ong·aia aro iako chinga mamung saloba ong·gija dake drae ra·na miksongani dongja,” ine SDA Church-ni dilgiparang talataniko on·angaha.

Te·gite Maharini agantalatani aro gisikni chanchianirangko SDA Church ma·sichakenga talataniko on·angengon, NHM aro Maharini gisepo jena kingking meligrike kamko matchotjaskal ia agreement-ko SDA Church ra·chakna man·jawa aro da·o Jengjal PHC-na rama tariani kamrangkoba SDA Church jako ra·e ka·atenga ong·ja ine SDA Church-ni dilgiparang parakataha.

“Chinga da·o chingni Jengjalo donggipa Nursing Home-oni mamung politics kal·ani ba toromni gita mikkang nigija nama sanna bananiko on·nangkuna chingni miksongani ong·a. Chinga Jengjal aro Garo Hills gimikni manderangko sana banani kamrango dakchakenganina mitelbea,” ineba SDA Church-ni dilgiparang parakataha.