WILLIAMNAGAR: Meghalaya a·dokni skanggipa Chief Minister Captain Williamson A Sangma-ni chang 31-gipa siani salko Mongolbar salo, East Garo Hills a·jani Williamnagar Deputy Commissioner (DC) office-oba gisik ra·e maniangaha.
Ia salko gisik ra·na gita kan·dike tom·aniko ong·atanio East Garo Hills a·jani Deputy Commissioner Swapnil Tembe, tom·anio bak ra·giparangna aganprakengon, Capt Sangma sagini a·dokna on·gilanggipa kamrangni gimin gisik ra·atpilaniko dakangaha. Uni rakbee kamrangko ka·anichisa Meghalaya a·dokko man·aha ineba Tembe aganaha
Iana skang, East Garo Hills DRDA-ni Project Director aro ADC Levastone Marak, tom·bagiparangna rimchaksoani kattarangko aganangengon, Captain Sangma-ni a·dokna dangdike on·anganina mittelpilskaani aro mande ra·pilskaaniko on·na gita uni donanggipa kamrangko ja·rikna nanga ine aganaha.
