TURA: Re·anggipa Sombar salo, Dalu-chipakni Purakhasia rama gita ro·ong salangenggipa dumper truck gari bolsani me·chikma saksako salpake uni ja·ako be·atahani gimin Garoland State Movement Committee (GSMC) aro A·chik Holistic Awakening Movement (AHAM) dolrang raken jegalatenba, mikkangchi iandakgipa a·sel ong·anirangko champengna man·na gita truck garirangni re·ruraanirangko mikrakbate nirok sandichina sorkariko didiataha.
“Truck garirangni skatang salruraengani a·sel iandakgipa a·selko chagrongani ian skanggipa chang ong·ja indiba batanggimin somoirangoba iandake truck garirangni skatang salengani a·selan bang·a janggirangan gimaatako man·na nangaha aro mitamrang bilongbee saknaanirangko man·tokna nangaha. Uni gimin iandake truck garirangni skatang salaniko chinga raken jegalenga aro mikkangchi iandakgipa a·selrang ong·taijana gita truck garirangni re·ruraanirangko nambate nirok sandichina didienga,” ine GSMC-ni assistant general secretary Cyril A Sangma parakataha.
Apsan daken, ia a·sel ong·aniko AHAM dolba raken jegalataha aro ramarango truck garirangni skatang salruraaniko nambate nirokchina district official-rangko didiataha.
AHAM-ni vice president George Prince Cheran-ni parakatani gitade, ia ramao me·chikma saksako salpakgipa gariara Assam Kamrup-oni saksa Sohid Ali minggipa mandeni gari ong·achim aro ia truck garini nombor-ara AS-01KC 6066 ong·achim.
“Ia a·sel ong·anina chinga truck gari salgiparangko raken jegalenga aro truck garirangni re·ruraanirangko name nirokjaengani gimin district official-rangkoba jegalatenga. Ramarango truck garirangni skatang salruraaniko nirokgenchimode aro ta·rakdugae salna on·jagenchimode iandakgipa a·selrangko nikna nangjawachim,” ine George Prince Cheran parakatenba, mikkangchi iandakgipa a·selrang ong·taijana gita truck garirangni salruraaniko nambate nirokchina official-rangko didiataha.
