TURA: West Garo Hills a·jani Purakhasia ramao ro·ong salgipa truck garichi salpakako man·gipa butchuma, bilongbee saknaanirangko man·enba siangna gita nangaha.
Bilsi 70 ong·gipa butchumako re·anggipa Sombar walo, Dalu-chipakni re·angenggipa dumper gari, Purakhasia jolo salpake ja·a samgnikon be·atahachim.
A·sel ong·ani ja·mano police-rang uko Tura civil hospital-ona ra·baengachim indiba ua Ampati-on janggi galaiaha ine koborko man·soaha.
Ia butchumako salpakeani ja·man, garini driver-ko police-rang rim·angengmiting somoio songni manderang ka·a ding·chaoenba, ia truck gariko so·chipe galskaaha.
Batanggimin somoirangoba ia rama gita ro·ong salruraenggipa truck garirang, skatang salengani a·sel baditaba sak manderangko siatahachim aro uandaken songni manderang aro dingtang dingtang dolrang, ia rama gita ro·ong salgipa truck garirangni re·ruraaniko jegaltokengachim.
Ia a·sel ong·ani ja·mano Garo Hills-ni dingtang dingtang dolrang, jekai GSMC, AHAM, FKJGP aro uandakgipa dolrangba raken jegalattokaha aro ia rama gita truck garirangni re·ruraanirangko nambate nirokchina district administration-ko didiataha.
