TURA: Rajabala by-election-na campaign-ko ka·anio Election Commission-ni dongimin niamrangko pe·taiahani gimin NPP aro Congress dolgninan show cause notice-rangko on·angtaiaha.
Antisamangna skangsan, Election-na dongimin niamrangko pe·ahani gimin NPP aro Congress dolgninan Rajabala by-election-ni Returning Officer, show cause notice-rangko on·ahachim aro ia changoba ia dolgnian apsan dake niamrangko pe·taiahani gimin Returning Officer, show cause notice-rangko on·angtaiaha.
Koborko on·ani gitade, Rajabala by-election-na campaign-ko ka·anio dongimin walni 7:00 bajina bate ia constituency-ni diltugipa biaprango campaign ka·ahani gimin Phulbari-ni NPP MLA SG Esmatur Mominin-na Returning Officer, show cause notice-ko on·aha.
“Phulbari-ni MLA SG Esmatur Mominin aro gitcham MDC Fozibur Rahman, walni 7:00 bajini ja·man Nalbari aro Nayagaon songrangona re·ange walni 10:30 bajiona kingking campaign ka·aha ine Indian National Congress (INC) chingna badi ka·aha. Uamangni chipe ra·rikgipa video-koba sakkina uamang chingna on·eaha. Uni gimin chinga Phulbari-ni MLA aro gitcham MDC-na show cause notice-ko on·ataha,” ine Returning Officer CN Sangma parakataha.
Indake ong·engon, re·anggipa Robibar attamo, Election Commission-ni dongimin niamko pe·e New Bhaitbari-o mande chakpilgija tom·bimonganiko ong·atahani gimin Election Commission, Congress dolni election agent-naba show cause notice-ko on·aha ine kobor on·aha. Ia tom·bimonganiko ong·atanio MPCC-ni president Vincent Pala, Opposition dolni dilgipa Mukul Sangma aro Congress dolni dingtang dingtang dilgiparangba bakko ra·angahachim.
Star campaigner-rang baksa political dolrangni tom·aniko ong·atanio sak 1000-na batgija tom·aniko ong·atchina gitasa Election Commission, niamko donmanahachim ine nikna man·a.
“New Bhaitbari-o Congress dolni tom·bimonganio dongimin niamna bate manderang tom·bimongaha aro iako chinga video-rangoniko aro songbadrangonikoba nikna man·aha. Uni gimin Congress dolni election agent-naba show cause notice-ko on·aha,” ine Returning Officer parakataha.
Indake ong·engon, election-na dongimin niamrangko badiaba political dolrang ba candidate-rang pe·ako nikgenchimode ua biapon FIR ka·na gita Election Commission, flying squad aro magistrate-rangna bilko on·manaha ineba Returning Officer parakataha.
