TURA: Bristibar attamo, Congress dolni dilgipa Zenith M Sangma, West Garo Hills a·jani District Election Officer (DEO) Ram Singh aro Rajabala by-election-ni Returning Officer CN Sangma-ko grongenba, Congress dolna kam ka·gipa manderangko chadrapanio jak donggipa manderangkode rim·jaenga indiba NPP-ni biming minggipa manderangkosan rim·enga ine badi ka·doangaha.
“Angni report-ko on·engmiting somoiona kingkingan dos donggipa manderangkode police-rang rim·kujaenga aro rim·naba jotton ka·kujaenga. Dolgipinni badi ka·anikosan police-rang knachake ja·kurangko de·aha indiba ia pilakan Congress dolni kosako matnange ja·ku de·anirangsa ong·achim. Iandake police-rangni mikkang nitee kam ka·aniara jakgitelgipa aro nama bewalo ong·atenggipa election-ni niamko pe·ani ong·enga,” ine Zenith, uni badi ka·doanggipa chittio parakataha.
Dolgni dinggrikanio aro ro·ongrangko goanio bang·a manderangan saknaanirangko man·na nangaha ineba ua parakataha.
Indake ong·engon, dolsani FIR ka·ani gitasan ja·kuko de·aniara aro dolgipinni badi ka·anirangko knachakgijaniara niam retiko rakkidilenggipa dolni niam pe·aniko mesokani ong·enga ineba Congress dolni dilgipa parakataha.
