TURA: South Garo Hills a·jani Wildlife Division (BNP)-ni ning·o donggipa Baghmara aro Rongara Range Forest-rango chu·gimik jako ra·e kam ka·nagipa ranger-rangko songe on·china gita Garo Students Union (GSU) Mindikgre regional unit-ni president Greneth M Sangma dabiangaha.
Sangma-ni parakatani gitade, Baghmara aro Rongara-na songe on·gipa ranger-rang kam watangaonin Baghmara Range Forest-o forester saksansa Range officer aro Forest officer-ni kamkoba jako ra·enga aro Rongara-ode gital officer-ko songe on·taia dongkujachim.
Wildlife Division (BNP)-ni ning·o Angratoli reserve, Siju reserve aro Panda reserve-ko man·chape bang·bata biaprangkon man·chapa ine talataniko on·angengon, ia biaprangko nirokna gita officer-rang chu·ongjaengani a·sel, kam ka·enggipa officer-rangba neng·nikanirangko chagrongna nangtokenga ine GSU Mindikgre unit-ni president parakataha.
Indake ong·engon, ia biaprangko nirokna gita officer-rangko songe on·china, tangka paisarangko on·dapatchina, kam ka·giparangko rakkidapchina aro Gasuapara-o dingtang range office baksana officer saksako on·china gitaba GSU Mindikgre unit, Shillong-o donggipa Forests (Wildlife)-ni Chief Conservator-ko didiataha.
