AMPATI: ‘Azadi Ka Amrit Mahosav’ aro Pan India Legal Awareness & Outreach Campaign-ni bak gita South West Garo Hills a·jani District Health & Family Welfare department aro District Legal Services Authority (DLSA)-ni gita National Legal Services Authority (NLSA)-ni ning·o dingtangmancha Mega-cum-Health Camp-ko Bristibar salo, Garobadha PHC-ni ning·o donggipa Gandhipara-ni Kashbanagar Secondary School-o ong·atangaha.
Ia Mega camp-ko ong·atanio indin porikka ra·e niani, an·seng baljokani bidingo agan-talate on·ani, ainni bidingo talate on·ani, Aadhar-na biming segatani, banking, e-Shram-na biming segatani aro uandakgipa dingtang dingtang program-rangko dingtang dingtang department-rang baksa nangrime ong·atangaha.
Ia mega camp-ko ong·atanio South West Garo Hills a·jani Deputy Commissioner Ch Ramakrishna, jinmana aganprakangengon, manderangna ainni gita dakchakanirangko manderangna indin on·na aro manderang jedakode koros aro somoi bon·gijan iandakgipa dakchakanirangko ra·na man·gen, ua miksonganio ia camp-ko ong·ataha ine parakangaha.
Bi·sarangna tika su·ani program-rangko ong·atanio gisiko nange bakko ra·enganina ua Gandhipara songni ma·giparangko mittelpilangengon, dingtang dingtang tikarangko aro COVID-19-ni tikarangkoba matchote su·e ra·china gita ua jolo songdongenggipa manderangko didiangaha.
COVID-19 tikako matchote su·e ra·gipa manderangoni ja·delbatsranggipa mande sakgittamna ia mega camp-ko ong·atanio SWGH a·jani DC mande ra·pilskaaniko dakangjolaha.
Ia mega camp-ko ong·atanio dongpae jinmana aganprakanggipa gipin manderangara, SWGH a·jani DMHO Dr Lily Sengme Ch Marak, SWGH a·jani CJM aro DLSA-ni Secretary NM Sangma baksana gipinrang ong·a.
