TURA: Assam a·dokni Goalpara-oniko rim·gittangbagipa mande saksako police-rangni bilakbee sandianirangko dakani ja·man uko rim·gittangbagipa manderang, East Garo Hills a·jani song damsao watpilaha ine kobor on·aha.
Police-rangni u·iatani gitade, Goalpara-ni saksa Robiul Islam minggipa mandeko ma·sina man·gijagipa manderang rim·gittangangaha aro uko East Garo Hills a·jani Rongjeng police station-ni ning·o donggipa Rongmil jolo rim·e donenga ine re·anggipa Sukrobar salo Goalpara-ni SP-oniko kobor man·soa bakan East aro North Garo Hills a·jani police-rang, Assam-ni police-rang baksa North Garo Hills a·jani Gabil Bi·sa jolrangoniko bilakbee sandina a·bachengaha.
Police-rangni bilakbee sandianirangko dakani ja·man, ia mandeko rim·gittanggipa manderang, kenjagokenba uko Rongmil OGC-ni ning·o donggipa Chikal Pekro songo watpilataha ine police official-rang u·iataha.
“Ia mandeko rim·gittangani bidingo Goalpara SP-ni koborko on·atani ja·man Assam-ni police dolrang Sukrobar waljatchion Rongmil-ona sokbaaha aro ia mandeko jokatna gita East Garo Hills-ni Special Operation Team, North Garo Hills-ni police aro Assam-ni police-rang baksa bilake sandina a·bachengaha. Ia mandeko rim·gittanggipa manderang Sonibar walni 9:00 bajimango Rongmil OGC-ni ning·o donggipa Chikal Pekro songo watpilaha,” ine East Garo Hills a·jani police official-rang parakataha.
Jokata man·gipa mandeko Assam police-na aro uni nokdangona watatpilna gita East Garo Hills a·jani police-rang nanga kamrangko matchotatenga ineba parakataha.
Indake ong·engon, ia mandeko rim·gittanganio jak donganina police-rang, Bronson Momin minggipa mande saksako rim·e sing·sandianirangko dakenga ineba police official-rang parakataha.
