SHILLONG: North Garo Hills a·jao railway station-ko kuliani ja·man Garo Hills-ni manderang bang·a namgnirangko man·na a·bachengaha ine janapatenba, Ri Bhoi a·jani Byrnihat-onaba bostu salgipa rel gariko ra·napbana on·china gita Meghalaya a·dokni Chief Minister Conrad Sangma, jolo songdongenggipa manderangko didiataha.
Meghalaya a·dokona niam gri napsrukanirangko champengna gita rakbatgipa niamrangko ra·gatkujaskal, Meghalaya a·dokona aro mongsongbate Ri Bhoi-Khasi Hills jolrangona rel garirangko ra·bana man·jawa ine jolni NGO-rang jegaltokengachim ine nikna man·a.
Indake ong·engon, North Garo Hills a·jaona rel gariko ra·anga intalan manderang aro mongsongbate bading chiwale cha·enggiparang bang·a namgnirangko man·na a·bachengaha aro manderangni janggi tangani gadangrang tang·dobataha ine Chief Minister parakatskaenba, Byrnihat-onaba bostu salgipa rel gariko ra·bagenchimode manderang bang·a namgnirangko man·genchim ine talataniko on·angaha.
“Mendipathar jolrango me·su samjak pale cha·giparang skangode salo gong 100-200 dakerangsan man·aiachim indiba rel gariko ra·angani ja·mande uamang Guwahati-ona re·bae an·tangtangni me·su samjakrangkoba pale cha·na man·engaha aro uandaken da·o uamang salprakon gong 2000-3000-rangko man·skaengaha. Skango Mendipathar-o dam rakgipa bosturangkoba da·ode Krishnai-Dudhnai-rangona baten dam komibate man·engaha. Ia pilakan ua biapona rel gariko ra·baanichi ong·aha,” ine Chief Minister parakataha.
Mendipathar Railway Station-ona re·baenggipa manderangko nirok sandina dingtangmancha facilitation centre donga ineba ua talataniko on·angaha.
“An·ching da·o dipet bostu salgipa rel gariko Byrnihat-ona ra·bachengna man·gen aro ja·mano manderang chu·ongnikahaon mande salgipa rel garirangkoba ka·sine ra·bana man·gen,” ine Sangma, ku·pattianiko on·angaha.
Indake ong·engon, MDA-o bak ong·paenggipa HSPDP dolba, Ri Bhoi a·jaona rel gari ra·napanganiko jegalataha aro niam gri napsrukanirangko champengna gita niamrangko ra·gatchenggijade rel gariko ra·napjachina didiataha.
“Beben rel gariko ra·baanichi ia jolrango donggipa manderangna bang·a namgnirang ong·naba gnang indiba niam gri napsrukanirangko champengna niamko ra·gatchenggenchimosa iani bidingo chinga agangrikna man·gen,” ine HSPDP-ni president KP Pangniang parakataha.
