TURA: South West Garo Hills a·jaoba Mahendraganj jolrango bang·en bol ratani karkanarangko niam gri chalaitokenga ine Garoland State Movement Committee (GSMC) Zikzak unit parakatenba, ia jolrango niam gri chalaienggipa saw mill-rangko sandie chipatchina gita Forest official-rangko didiataha.
GSMC Zikzak unit-ni general secretary Dichon Marak-ni parakatani gitade, Mahendraganj jolrangoba niam gri bol ratani karkanarangko kulie, Garo Hills-ni dingtang dingtang biaprangoniko bol wa·arangko salangenga aro ia karkanao bolrangko rate pale cha·tokenga.
“Garo Hills-o bol wa·arangni gimaroroangenganiko champengna gitade skanggipa iandake niam gri chalaienggipa saw mill-rangkoba chipatchengna nangenga maina ia saw mill-rangko chalaienggipa manderang, Garo Hills-ni bol wa·arangko niam gri ra·ange pale cha·tokenga,” ine GSMC Zikzak unit-ni general secretary parakataha.
Ia saw mill-rangko sorkari official-rang sandie chipatjagenchimode GSMC-ni manderang an·tangtangan chipatna draatako man·gen ineba ua parakataha.
