SHILLONG: Meghalaya a·doko Congress doloni ong·kate Trinamool Congress (TMC)-o napanggipa sak 12 MLA-rang, an·tangtangko seokgipa manderangkosa cha·boka gita ong·aha ine Sukrobar salo Meghalaya a·dokko nirokenggipa All India Congress Committee (AICC)-ni dilgipa Manish Chatrath parakataha.
Meghalaya a·dokni gitcham chief minister Mukul Sangma-ko man·chape Congress dolni sak 12 MLA-rang, re·anggipa Budbar walon TMC-o napangskaahachim. Sak 12 MLA-rangni ong·katani ja·mano a·doko ong·enggipa obostarangko nipilna gita AICC-ni dilgipa, Sukrobar salo Shillong-ona sokbaaha.
Chatrath-ni parakatani gitade, ia sak 12 MLA-rangko dingtang dingtang constituency-ni manderang, uamango Congress dolo ka·dongchakesa seokahachim indiba uamang manderangni ka·donge seokaniko cha·boka gita ong·aha.
Sak 12 MLA-rangni ong·kate TMC-o napangani ja·man Congress dolni dilgiparang, Sukrobar salo Meghalaya Pradesh Congress Committee (MPCC)-ni president Vincent Pala-ni noko tom·aniko ong·atangahachim indiba ia tom·anio Congress dolni MLA sakgittam, chong·motan PT Sawkmie, Mohendro Rapsang aro Ampareen Lyngdoh-san bakko ra·angaiaha. Congress dolni MLA sakgni, chong·motan Kimfa Marbaniang aro Mayralborn Syiem-de ia tom·anio bakko ra·eskajahachim.
Congress doloni ong·kate katgipa MLA-rangni gimin a·bachengonin uamang ma·sisoachim aro iani giminan ua a·dokni dingtang dingtang biaprangona wenange Congress dolo bimingrangko segataha ine MPCC-ni president Vincent Pala-ba parakataha.
