TURA: NEHU-ni ong·atgipa online porikkao seanirangko name nijani a·selsa bang·bata chatro chatrirangan chu·onga gita mark-rangko man·tokjae, da·o chubata gadangrango poraidapna nangenggipa chatro chatrirang neng·nikanirangko chagrongna nangtokenga ine Niksamso A·chik Society (NAS) matnangataha.
NAS-ni parakatani gitade, NEHU-o poraienggipa chatro chatrirang aro mongsongbate Law-ko poraienggipa chatro chatrirang, kacharirango practice ka·na gita komibeoba 50 percent-kode man·na nangtelachim indiba online gita porikkako ong·atanio chatro chatrirangni porikka seanirangko NEHU-ni official-rang, name nijahani a·selsa bang·bata chatro chatrirangan chu·onga gita mark-rangko man·tokjahachim.
“Sajinmani somoirango NEHU-ni gita online porikkako ra·anio uamang chatro chatrirangni porikka seanirangko name nina gisiko nangjaha aro iani a·selsa bang·bata chatro chatrirangan chu·onga gita mark-rangko man·tokjaha. Online gita porikkako seanio bang·bata chatro chatrirangni komibate mark-rangko man·aniara ong·na amgijani ong·a aro mitam chatro chatrirangnade da·o porikkarangko sepiltaiani cholrangba dongjaha,” ine NAS-ni general secretary Tengrak R Marak parakataha.
2021 bilsini National Achievement Survey-o Meghalaya a·dokko lekka porani gita komibatsranggipa a·dok ine parakgipani bidingo janapatengon, chatro chatrirang rakbee poraiengoba a·dok sorkari aro Board-rangko chalaienggiparangan gisik nangteljagenchimode chatro chatrirangko dos galna man·jawa ine NAS parakataha.
Garo Hills-ni chatro chatrirangna provisional cerficate aro gipin certificate-rangko NEHU Tura campus-on on·china gitaba NAS dabiangaha.
“An·tangtangni nangchongmota certificate-rangko ra·na aro gipin chonchona kamrangna Shillong-ona re·anganiara chatro chatrirangna namen neng·nikani ong·engani gimin Garo Hills-ni chatro chatrirangnade provisional aro uandakgipa gipin certificate-rangko NEHU Tura campus-on on·china chinga dabienga,” ine NAS-ni general secretary parakataha.
