SHILLONG: Salgro salaram a·dokrango Citizenship (Amendment) Act (CAA) 2019-ko jegaltokengani gimin, salgro salaram a·dokrango songdongenggipa manderangni namgnina chanchie ia CAA-ko ra·galpilchina gita re·anggipa Robibar salo, Tura-ni MP Agatha Sangma, BJP-chi dilenggipa National Democratic Alliance (NDA) sorkariko didiangaha.
Parliament-ni Winter Session-ko November 29 tarikoni a·bachenge December 23 tarikona ong·atengani gimin ia session-ni bidingo chanchirimna gita re·anggipa Robibar salo NDA-ni tom·aniko ong·atanio Tura-ni MP, CAA-ko ra·galpilchina ma·mong sorkariko didiangaha.
Ia tom·anio Union Defence Minister Rajnath Singh, Union minister Prahlad Joshi aro sakgipin Union minister Piyush Goyal-ba dongpae bak ra·angahachim.
“Manderangni namgnini gimin chanchien farm laws-koba ma·mong sorkari ra·galpilahani gimin apsan daken salgro salaram jolrango songdongenggipa manderangni namgninaba chanchie CAA-ko ra·galpilchina anga ma·mong sorkariko mol·molaha,” ine NDA tom·a matchotani ja·mano Agatha Sangma, kobor ra·timgiparangna aganaha.
Iani bidingo ma·mong sorkari maming aganchakanirangkode on·kuja indiba NDA-o bakrimenggipa pilak dolrangni nangnikanirangkon sorkari see ra·angaha ineba Sangma parakataha.
“Anga ia dabianiko angni dol aro salgro salaram jolo songdongenggipa manderangni pal dakaha aro anga chanchia mitam dolrangba angni nangnikani gitan iako ra·galpilchina nangnikgen,” ine NPP-ni MP parakataha.
Ia Citizenship (Amendment) Act-ara Pakistan, Bangladesh aro Afghanistan a·songrangoni India a·songo katnape songdong a·chaenggipa Hindu, Sikh, Jain, Buddhist, Parsi aro Kristianrangko citizenship on·na ba songdongkamgiparang ine channa gita ra·gatgimin niam ong·achim aro ia Bill-ko 2019 bilsini December 12 tariko Parliament-o pass ka·ani ja·man 2020 bilsioni ma·mong sorkari niam ra·gatahachim.
