SHILLONG: Opposition Congress dilgipa Dr Mukul Sangmani, Congress-oni ong·katani ja·mano, angko man·chapate bang·a gitcham Congress dilgiparangan party-ona re·bapiltokna am·enga ine MPCC General Secretary Deborah Marak-ni ku·watgipa kattarang kakket ong·ja ine Mendipathar-ni gitcham MLA aro NPP-ni a·gipi Vice President Frankenstein W. Momin jegalataha.
Mukul Sangmani sorkari rikdilmitingo aro party-ko dilmitingo uni kamrangna suk ong·jae party-ko wate katanggipa bang·a dilgiparangan da·o, Mukul Sangmani congress-oni ong·katani ja·mano party-ona re·bapilna am·tokenga ine MPCC General Secretary Debora Marak mnisalo koborni manderangna parakahachim. Mendipathar-ni gitcham MLA F.W. Momin-ba party-ona re·bapilna skaniko parakaha ine Marak uni kattao janaphachim, indiba ian kakket ong·ja ine Momin jeataha.
Bebegita anga Mukul Sangmani gimin Party-oni ong·katahaoba, party-ona re·bapilna skaniko darangnaba aganan dongja. Anga namgninan party-oni ong·kataha aro party-ona re·ngpilna mamingsaloba chanchia dongja. Anga Congress Party-na nama skaniko on·a indiba anga da·ode NPP Party ming ong·jok aro uanon pangnan ong·aignok ineba Momin taldapataha.
