TURA: SSA skulrango skigiparang da·o jadok ong·pile an·tangtangni dormaharangko man·tokkujaengani gimin okumu chake jingjengatanirangko daktokengon, BJP Tura City Committee-ni Mahila Morcha aro Garo Students Union (GSU) Zikzak unit-ba skigiparangna chakpaaniko parakataha aro skigiparangna ta·raken uamangni man·na nangkuenggipa dormaharangko on·jagenchimode skigiparangni jingjengatanio bakko ra·angpana gita ku·rachakniko on·ataha.
SSA skulrango skigiparangna uamangni man·na nangkuenggipa dormaharangko on·kujaengani gimin BJP Tura City Committee-ni Mahila Morcha, a·dok sorkariko matnangatengon, skigiparang duk mikchi gnang jingjengatanirangko dakengoba, a·dokni chief minister aro a·dok sorkari maming aganchakanirangko on·kujaenga aro ian skigiparangna sorkarini simsakgijaniko mesokani ong·enga ine parakataha.
“Skigiparangna chingni bakrimaniko on·anio chinga maming politics-ni gita chakataniko mesokani ong·jaenga indiba ian chingni mandeskana ka·sachakaniko mesokanisa ong·enga. Skigiparangni okumu chake jingjengatanio chinga skigipa aro ma·gipa saksani jagni ong·gipa bi·sako rimbite jingjengataniko nikaha aro uamang indita jani dormaharangko man·jae neng·nikanirangko man·engani giminsa duk mikchi baksa jingjengatna nangao ga·akenga. Sani a·sel skigiparang iandake duk mikchiko chakna nangenga? Iani bidingo maini gimin chief minister Conrad Sangma jrip dongenga?” ine Mahila Morcha-ni president Rakhi K Sangma sing·doangenba, skigiparang an·tangtangni dormahana jingjengatanirangko dakengoba da·onan district administration ba a·dok sorkari, skigiparangko gronge agangrika dongkujaenga ine parakataha.
Da·o Krismas aro Bilsi Gitalko maniani somoirang sokbaengahaon, skigiparangna uamangni man·na nangenggipa jadokni dormaharangni pal jagnini dormaharangko on·na ku·rachakaniara skigiparangna chu·onggenma ineba Mahila Morcha, a·dok sorkariko sing·doangaha.
“Skigiparangni iandakgipa dukni somoio chinga BJP Tura City Committee-ni Mahila Morcha-ba uamang baksa ong·enga aro skigiparangna ta·raken uamangni man·na nangkuenggipa dormaharangko on·china a·dok sorkario dabiangkugen. Nanggenchimode chingaba skigiparangni jingjengatanio apsan dongpae bakko ra·anggen,” ine Mahila Morcha-ni president Rakhi K Sangma parakataha.
Apsan daken, GSU Zikzak unit-ni gitaba skigiparangni dukko chake jingjengatenganina an·tangtangni suk ong·gijaniko parakataha aro skigiparangna ta·raken uamangni man·na nangkuenggipa dormaharangko on·china gita a·dok sorkariko didiataha.
GSU Zikzak unit-ni general secretary Silman M Marak-ni parakatani gitade, Meghalaya a·doko aro mongsongbate Garo Hills-o SSA skulrangko kuliani a·selan kangal cholgrirangba lekka poraniko ra·pana chol ong·engachim indiba skigiparangna somoi gita dormaharangko on·jaengani a·selan skulrangko ka·ani tik ong·jae skulrango poraienggipa bi·sarangsa nangchakeaniko man·batskaengahachim.
“Uni gimin skulrango skie on·aniko namdapatna gitade skanggipa skigiparangnan dormaharangko name on·chengna nanggen maina skigiparang somoi gita dormaharangko man·genchimosa kamrangkoba nambate ka·na man·gen aro a·doko lekka porani gadangko tang·doatna man·gen,” ine GSU Zikzak unit-ni general secretary parakatenba, SSA skulrango skigiparangna, uamangni man·na nangkuenggipa dormaharangko ta·raken on·china sorkariko didiataha.
SSA skulrango skigiparangni man·na nangkuenggipa dormaharang da·o jadok gappilengahani a·sel neng·nikanirangko chagrongna nangtokengahani gimin Garo Hills-ni skigiparang, re·anggipa December 1 tarikonin West Garo Hills a·jani DC office mikkango okumu chake jingjengatna a·bachengatahachim ine nikna man·a.
