TURA: Meghalaya a·doko gitcham chief minister Mukul Sangma baksana Congress dolni sak 11 MLA-rang, All India Trinamool Congress (AITMC)-o napangani ja·man Garo Hills Autonomous District Council (GHADC)-oba mongsonggipa opposition dol ong·enggipa Congress dolni sak 11 MDC-rang, Trinamool Congress-o napgopangna siengahani gimin GHADC-o Congress chu·gimik bon·srangnaba dongaha ine kobor on·timgiparang u·iataha.
Ia bilsini GHADC election-o Congress dol, dam 12 biaprangko cheahachim indiba October jao Batabari-ni MDC Ashahel D Shira, Rajabala by-election-o susana gita Congress doloni ong·kate United Democratic Party (UDP)-o napangskaahachim. Rajabala by-election-o susana gita Congress dolni tikitko sakgipin candidate-na on·skaahani gimin Shira, Congress-oni ong·kate UDP-o napangskaahachim.
Re·anggipa antiosan, Congress dolni dilgipa Mukul Sangma-ko man·chape Meghalaya a·dokni sak 12 Congress MLA-rang, Congress-oni ong·kate West Bengal-ni Chief Minister Mamata Banerjee-chi dilenggipa All India Trinamool Congress (AITMC)-o napangskaaha aro uandaken da·o GHADC-ni pilak Congress MDC-rangba Trinamool Congress-o napangna gita siengaha ine kobor on·timgiparang parakataha.
“Chinga GHADC-ni pilak Congress MDC-rangan ia antini gisepon Trinamool Congress-o napanggnok aro chingoni darangba Congress dolo dongriknagipa dongjaha,” ine Bristibar walo, MDC-rangoni saksa, kobor ra·timgiparangna parakataha.
Indake ong·engon, GHADC-o Congress dolni pilak MDC-rangan AITMC-o napangtokna siengaha ine agananiko Congress dolni mitam dilgiparang raken jegalatskaaha.
 |
ReplyForward
|
Comments are closed.