SHILLONG: Shillong-ni Archbishop, Rev. Victor Lyngdoh mijal Robibar-o ru·utgija sal somaio a·songni bang·a biaprango Kristian-rangko chadrapani a·selrangna raken jegalataha.
Ru·utgija sal somaio Karnatala, Belur jilani Jesus Prayer Hall-o bi·ani tom·a ong·engmitingo Bajrang Dal-ni manderang golmal ka·aha ine janapna man·gen.
“A·songo toromko a·rikanina, kakket ong·-gijajina aro onia ka·aniko chinga raken jegalata. Agan-ku·pattie on·china aro pilak rokomni toromko a·rikanirangko dontongna nangchongmotgipa ja·ku-rangko de·china anga bil gnangrangko didia,” Rev. Lyngdoh aganaha.
Ia dal·begipa a·song Isolo bebe ra·enga aro chinga ka·sagrikani, tom·tomanina aro jonga-adana Isolo bi·enga ine Shillong-ni Archbishop aganaha.
“Gitel Jesus Kristo Kristian-rangni pang-chakani ong·a. 2000-mang bilsirangp a·gilsako dongaha. Watatarangni chasongoni bil donga, Kristian-rang bang·a a·rikani aro ra·bianirangko chagrongaha. Kristo bebe ra·e so·otako man·e siang-giparangni an·chi Kristo bebe ra·aniko bilakbatat-enga. Aro ia a·rikgalani a·gilsakni dingtang ding-tang biaprango da·alona kingking ong·enga,” ua aganaha.
“India gita secular a·songo ia indake ong·gen ine chanchia dongjachim maina ia a·song mande ra·ani, kakket bichal aro songpanggipa sakantini tom·tomanina bilakgipa aro ku·cholsan ong·gipa ong·a,’’ ine Rev Lyngdoh aganaha.
Indake ong·engon, Khasi Jaintia Christian Leaders Forum (KJCLF), Karnataka aro gipin biaprango Kristian bebe ra·gipa ja·rikgiparangko golmal aro a·rikani kosako uamangni suk ong·gijaniko janapaha aro an·chingni a·songo pilak songpanggiparangni bil-rengsirangni kosako jemangan namgijako dakaha ua dolrangko matnangataha.
KJCLF secretary, Rev EH Kharkongor indake aganaha jemangan ong·gija dakako man·enggipa bebe ra·rimskaarangna uamangni jak on·paani kattarangko KJCLF watataha aro a·dokrango aro a·songo an·chingni jakgitelgipa a·songo pilak songpanggiparangna chel·chakaniko aro kakket bichalko on·china sorkari aro bil gnanggiparangko mol·molataha.
A·songo Kristian-rangko chadrapanio Shillong-ni Archbishop raken jegalata
Date:
Share post:
