SHILLONG: Robibar saloni Sombar salona konta 24-ni gisepo Meghalaya a·dok gimiko sak 16 manderang COVID-19 man·daptaiaha indiba ia konta 24-ni gisepo a·dok gimikon COVID man·e sigiparang dongtaijaha.
Konta 24-ni gisepo COVID-19 man·dapgipa sak 16 manderangko channe da·o Meghalaya a·dok gimiko COVID-19 man·e dongenggiparang gimik sak 246 gapengaha.
Konta 24-ni gisepo COVID man·gipa sak 16 manderangoni, sak 14-de East Khasi Hills-o, sak 1-de Ri Bhoi a·jao aro sak 1-de West Garo Hills a·jao ong·a.
Ia apsan salon gimik sak 14 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 82,878 gapskaengaha.
Da·o dipet Meghalaya a·doko COVID-19 man·e sianggiparang gimik 1475 gapengaha.
