TURA: Banggriani somoio dakna nanggnirangko manderangna mesoke on·na gita Bristibar salo District Disaster Management Authority (DDMA) aro National Disaster Response Force (NDRF) nangrimenba, mock drill-ko West Garo Hills a·jani dingtang dingtang biaprango ong·atangaha.
Banggriani somoirango medical, fire & emergency service aro uandakgipa dolrangan skanggipa manderangna dakchakanirangko on·giparang ong·ani gimin iandakgipa department-rangna aro jolo songdongenggipa manderangnaba mikrakataniko on·na gita ia mock drill-ko ong·atangaha.
Banggriani somoio kenchakna nangbatgipa biaprang, chong·motan Tura Super Market, DC Office, Tura Government Degree College, Police Reserve Ground aro Tura Civil Hospital-o ong·atangaha, jeon Civil Defence, MPRO, Police, Fire & Emergency Service aro dingtang dingtang department-ni volunteer-rang, banggriani somoio dakna nanggnirangko dake mesokangaha.
Ia Mock drill-ko ong·atangani ja·man dingtangmancha Tura Circuit House-o tom·aniko ong·atangenba, dingtang dingtang dolni manderangna agan-talate on·anikoba dakangaha aro ia tom·anio Revenue & Disaster Management-ni in-charge ADC Mary T Sangma, 55 Bn BSF-ni Deputy Commandant BK Dwivedi, 120 Bn CRPF-ni Assistant Commandant Avadhesh Kumar Singh, 1st Bn NDRF-ni Inspector Kumar Gaurav aro gipin officer-rang dongpae bak ra·angaha.
