SHILLONG: West Jaintia Hills a·jani Mowkaiaw-o donggipa Sawlyngdoh Higher Secondary School-ni bilsi 50 gapaniko maniengon, Sukrobar salo a·dokni Chief Minister Conrad Sangma-ba ia skulni manianio dongpae bakko ra·angaha.
Ia skulni bilsi 50 gapaniko manianio a·dokni Chief Minister, dingtangmancha ia skulko man·e on·chengdilgipa Thomas Suchiang-ni statue ba bimangko aro skulni souvenir-koba oprake on·angjolaha.
Ia tom·anio a·dokni Chief Minister jinmana aganprakangengon, 2018 bilsini election-na skang uamangni ku·chakgimin gitan a·doko lekka porani gadangko nambatatna gita ia sorkari, dingtangmancha lekka porani kamrangna mikpakma nie kamrangko ka·enga ine parakangaha.
“A·doko lekka porani kamrangna chinga bang·bea tangka paisarangko koros ka·engoba dingtang dingtang ra·bianirangko chagrongna nangenga indiba ia ra·bianirangko chinga ka·sinsin mikkangpae lekka porako dingtangatna jotton ka·enga,” ine Sangma aganaha.
Lekka porani kamrangna sorkari, bilsiprakon gong kror 2000-mangko chame on·enga ine janapatengon, a·dokni dingtang dingtang biaprango donggipa skul nokrangko namdapatan baksana skulrango poraienggipa aro skie on·enggipa pilaknan ia sorkari, dingtanganiko ra·bana jotton ka·enga ine Chief Minister parakataha.
Ia jolo donggipa bi·sarangni namgnina ia skulko bilsi 50-na skang kulie on·anggipa manderangkoba ua mittelpilangaha.
Ia Sawlyngdoh Higher Secondary School-ni bilsi 50 gapaniko manianio dongpae bakko ra·anggipa gipin manderangara, a·dokni Education Minister Lahkmen Rymbui, Commerce & Industries Minister Sniawbhalang Dhar, jolni MLA Nujorki Sungoh aro gipinrang ong·a.
Sawlyngdoh HS School-ni bilsi 50 gapaniko manianio CM bakko ra·anga
Date:
Share post:
