TURA: NABARD-ni dakchakanichi self help group (SHG)-rangni exhibition-cum-sale program-ko Sukrobar salo, Bakdil dolni gita Baghmara-ni Bakdil Training Centre-o ong·atangaha aro ia program-ko Gasuapara-ni BDP Tengchi Momin, do·ga oe on·angaha.
SHG-rangni exhibition aro sale program-ko do·ga oe on·angani somoio Gasuapara-ni BDO, jinmana aganprakangengon, jolo donggipa me·chik SHG-rangna dakchakanirangko on·engani gimin Bakdil aro NABARD-ko mittelpilangenba, me·chikrangni janggi tangani gadangko nambatatna gita loan-rangko on·engani gimin bank-rangkoba mittelpilangaha. An·tangtangni ra·srogipa tangka paisarangko somoi gita chotrongchina gitaba ua me·chik SHG-rangko didiangskaaha.
Ia program-ko ong·atanio NABARD-ni District Development Manager Khelchandra Chongtham-ba dongpae jinmana aganprakengon, ia exhibition aro sale program-rangko ong·ataniara South Garo Hills a·jani me·chik SHG-rangna, an·tangtangni bosturangko pale sim·e an·tangtangna man·dapaniko ra·bana dakchakani ong·gen ine parakangaha. Bazar antirangna kragipa mingsa ba minggni bosturangko gisiko nangbate tarichina gitaba ua SHG-rangko didiangaha.
Ia program-ko ong·atanio dongpae jinmana aganprakanggipa gipin manderangara, Meghalaya Rural Bank, Baghmara Branch-ni Manager Pratap Chetry aro gipinrang ong·a.
