TURA: West Garo Hills-o kal·ani bostu ba boksis baksa kadepe palgipa cha·anirangko champengatna district administration ge·etaniko on·aha.
Re·anggipa antio saksa me·a bi·sa cha·ani kadepo ba chip pakage-o tangka bisil dongako nikjae minokmane neng·nikako man·aha. Tangka bisil bi·sani rang·sitani pipe -ko champengaha.
Indiba Tura Civil Hospital-ona sanna ra·angon doctor-rang bi·sani air pipe-o tangka bisil dongako x-ray ka·e nion nikaha aro maming neng·nika gri bikote galna man·aha aro bi·sani janggiko naljokataha.
Bang·a company-rangan bi·sarangko mikbokatna uamangni tarigipa cha·ani kadep ning·o kal·ani bostu ba chonbegipa boksisrangko chipjole tarie palenga.
Aro bang·a ma·a-paa aro bi·sarangan kenbegniko niksamsoja, uni gimin deputy commissioner Ram Singh, official-rangko uandakgipa cha·ani kadeprangko nirokchina ge·etaha.
