SHILLONG: Assam aro Meghalaya simani bidingo East Jaintia Hills District Regional Committee-ni report-ko ta·rake on·china gita Meghalaya a·dokni Chief Minister Conrad K Sangma ge·etangaha.
PHE Minister Renikton Lyngdoh Tongkhar-chi dilenggipa West Khasi Hills District Committee aro Deputy Chief Minister Prestone Tynsong-chi dilenggipa Ri Bhoi District Regional Committee-ni report-ko on·ani ja·mano a·dok sorkari, dingtang dingtang dolrang baksa tom·e chanchirimangenba, East Jaintia Hills District Regional Committee-koba ta·raken report-ko on·china ge·etangaha.
“Committee dolgnide uamangni report-rangko on·manaha aro da·o East Jaintia Hills District Regional Committee-ba Assam-ni committee baksa chanchirimengkua. Dolgnini gisepo chanchirimanirang matchotahaon East Jaintia Hills District Regional Committee-ba sorkarina report-ko on·gnok,” ine Chief Minister Conrad Sangma parakataha.
Report-ko ta·raken on·china gita ua committee-ni chairperson-ko aganatmanaha ineba Chief Minister aganaha.
West Khasi Hills aro Ri Bhoi District Regional Committee-rang an·tangtangni report-ko sorkarina on·manahaoba East Jaintia Hills Regional Committee-de report-ko on·na gita somoiko bi·dapahachim ine nikna man·a.
Ia regional committee dolgittamko November 30 tarikni gisepon report-rangko on·china gitaba sorkari ge·etmanahachim.
Assam aro Meghalaya a·dok damgnini simarango meligrikna man·jaenggipa biaprangoni damdok biaprangko namatchengna gita a·dok damgnian dolgittam regional committee-rangko songahachim ine nikna man·a.
Skanggipa bako namatchengna gita a·dok damgnini kam ka·enggipa biaprangara, West Khasi Hills a·jani Tarabari, Gizang aro Hahim, East Jaintia Hills-ni Ratacherra aro Ri Bhoi a·jani Boklapara baksana Khanapara aro Pilangkata jolrang ong·engachim.
