SHILLONG: Congress dolko watgale All India Trinamool Congress (AITC)-o napanggipa sak 12 MLA-rangni kosako ja·kuko de·china dabigipani bidingo name nikuenga ine Budbar salo, Meghalaya Legislative Assembly-ni Speaker Metbah Lyngdoh parakataha.
Iani bidingo kobor ra·timgipa manderang baksa agangrikengon, sak 12 MLA-rangko Assembly-oniko ra·galchina dabigipani bidingo ua niamo pangchake poraie nichengenga aro niam gitasa ua ja·kuko de·anggen ine Assembly-ni Speaker parakataha.
“Niamo pangchake sak 12 MLA-rangko aganchakna gita u·iataniko on·manaha aro uamangna talataniko on·na gitade cholko on·na nanga,” ine Lyngdoh parakataha.
Assembly Speaker-ni aganani gitade, sak 12 MLA-rang, an·tangtangni aganchakaniko una on·manaha aro uarangko Speaker-ni office, name nipiltaina gita somoiko nanggen.
“Je ja·kuko de·na nanggenchimoba uan namgipa bewalo ong·na nanggen,” ine Lyngdoh aganaha.
Sak 12 MLA-rang ong·kate AITC-o napangani ja·man, ia sak 12 MLA-ko Assembly-oniko ra·galchina gita re·anggipa jao Congress dol, Assembly-ni Speaker-na sedoatahachim.
