SHILLONG: Meghalaya a·doko Congress dolni sak 12 MLA-rang, All India Trinamool Congress (AITC)-o napangani ja·man dingtang dingtang dolrangni gisepo adita nangchakeaniko man·tokengahaon, gipin dolrangni dilgiparangba bang·batan United Democratic Party (UDP)-o napna nangniktokengaha ine Sukrobar salo, UDP-ni general secretary Jemino Mawthoh parakataha.
“A·doko Congress dolni be·gruani ja·man dingtang dingtang political dolni dilgiparang nambatgipa cholko sanditokenga aro da·o dipet gital dolkode a·doko ra·chakna man·tokkujaengani gimin bang·bata dilgiparangan UDP-kon nambatgipa chol ine nikenga,” ine Mawthoh parakataha.
Badiaba dilgiparang UDP-o napna gita skanirangko parakahama ine sing·on, “Dingtang dingtang dolni dilgiparang ching baksa agangrikna an·tangtangni manderangko watataha aro uamangoni bang·batan UDP-ni tikitchi election-o susana sikenggiparang ong·a,” ine UDP-ni general secretary parakataha.
Ru·uta bilsirangna a·doko namatchipna man·jaenggipa neng·nikanirangko namatna aro namnamgipa dilgiparangko ong·katatna UDP nangnikenga ineba Mawthoh aganaha.
“Chinga mikkangchi a·dokna namroro silroroaniko ra·baan baksana namgipa dilgiparangko ong·katate a·doko nambate chalaina nangnikenga,” ine ua aganaha.
2018 bilsini Assembly election-o maikai UDP seat damdokko cheani ja·man, Shella, Ranikor aro Mawphlang by-election-rango chegipa ong·aha, uani bidingo gisik ra·atpilaniko dakangengon, UDP-o bang·bea associate membor-rangba donga aro GHADC election baksana Rajabala by-election-oba UDP-ni vote man·anirang namen tang·doaha ine UDP-ni general secretary parakataha.
“Ia pilakan UDP bilakbarorobaenga ine mesokani chin ong·enga aro ian dolna namgipa chin ong·a. 2023 bilsini election-ni ja·man UDP dolan mongsonggipa kal·gipa gita ong·gen,” ine Mawthoh aganaha.
