TURA: Sabisirangni giproroanichi manderang bilsi gimik neng·nikanirangko chagrongna nangtokahaoba re·anggipa December-ni 31 tarik walo Garo Hills-ni pilak biaprangon manderang, gitcham 2021 bilsiko watate ia gital 2022 bilsiko ka·srokbee nichaksotokaha.
Pangna bilsi dakronga gitan December 31 tarik walo gital bilsiko nichaksona gita Kristian bebe·ragiparang, an·tangtangni olakkiram nokrango Isolko olakkie tom·anirangko ong·atangaha aro walni 12:00 baji ong·ahaon saksa sakgipinna namgipa skanirangko on·e ia gital bilsiko rimchaksotokaha.
Apsan daken, January 1 tarik pringoba dingtang dingtang mondolirango giljarangko ka·e Isolko olakkiangtokaha aro gilja jokani ja·man dingtang dingtang songrango aro gittimrango jinma cha·rim ringrimanirangko dakangtokaha.
Re·anggipa 2021 bilsi gitalo COVID-19 sajinmani a·sel bang·bata biaprangon manderang, jinma cha·rim ringrimanirangko dakna man·tokjahaoba ia 2022 bilsini a·bachengaode manderang, songtangtango aro gittimtangtango jinma cha·rim ringrimanirangko nikna man·skaaha.
Bilsi gitalko nichaksoanio manderangna sorkari niamrangko dongenchimoba, pringwal 12:00 baji ong·ahaon manderang bomarangko so·na, gitrangko watna aro jinma kusi ong·e rona a·bachengtokaha.
Bilsiantian January 1 aro 2 tarikrango Garo Hills-ni dingtang dingtang biaprango manderang jinma Songkritan chroke an·sengtokrongani gimin ia changoba Garo Hills-ni bang·bata biaprangon iandake manderangni jinma chrok mesae roanirangko nikna man·taiaha.
Pangna bilsian January-ni 2 tariko North Garo Hills a·jani Bangsi A·pal songo manderangni jinma tom·dake apsan chrokanirangko nikna man·rongenga aro uandaken ia changoba ia songo manderangni jinma apsan chrok mesaaniko nikna man·taiaha. Bangsi A·pal songo jinma chrokaniko ong·atanio ua jolrango donggipa manderangsan ong·aigija Garo Hills gimikonin re·bae bak ra·paaniko nikna man·taiaha.
