TURA: Meghalaya a·dokoba bilsi 15-oni bilsi 18 ong·gipa chadamberangna COVID-19-ni tikarangko su·na a·bachengatahani gimin Tura jillaoba chadamberang altuae tikarangko su·e ra·na man·na gita sorkari, dam 11 tika su·chakgipa biaprangko donataha.
Official-rangni u·iatani gitade, ia tika su·chakgipa biaprango Budbar saloni Sonibar salona tikarangko su·e on·anggen aro ia biaprangara, Matchakolgre LP School, Matchakolgre Community Hall, Araimile Community Hall, Baldora SSA School, Mothers Union Secondary School, Upper Chandmari LP School, Mondol Tilla Community Hall, Pechon Memorial Secondary School, Natya Samiti, Dobasipara Community Hall aro RC Road-o donggipa Holy Child School ong·a.
Indake ong·engon, COVID-19 ta·raken giprorobaengahani gimin a·doko chel·chaksamsoaniko dakna gita Mongolbar salo, a·dokni Health official-rang, Education department-ni official-rang baksa tom·aniko ong·atangenba, skulo poraienggipa bi·sarangko ta·raken tika su·china gita ge·etangaha ine kobor on·aha.
“COVID-19-ni Omicron ta·raken giprorobaengani gimin skulo poraienggipa bi·sarangko ta·raken tika su·e ra·na man·na gita chinga Education department-ni official-rang baksa tom·e chanchirimangaha,” ine Mongolbar attamo Health department-ni Principal Secretary P Sampath Kumar parakataha.
