SHILLONG: Churangonikon Meghalaya a·doko kajina man·batenga ine a·dokni Excise Minister Kyrmen Shylla parakataha.
Excise Minister-ni parakatani gitade, sajinmani somoio lockdown-rangko ra·gatna nangahani a·sel a·doko bang·en noksan ong·atako man·na nangahaoba churangoniko komibeoba gong kror 250-kode kajina gilanio man·ahachim.
“Gnigipa changna lockdown-ko ra·gatani somoio churangko nokrangona sokate on·anichi kajinarangko chimongna man·skaaha. Ia changoba lockdown-ko ra·gattaina nanggenchimode ia apsan ja·kukon de·taina nangao ga·akgen,” ine Shylla parakataha.
Excise department-ni man·enggipa kajina gong kror 250 aro gong kror 300-ni gisepon ong·rongaia indiba uamang man·na dipetde a·dokna on·gilna jotton ka·gen ineba Excise Minister parakataha.
Meghalaya a·doko dingtang dingtang niamrangko ra·gattaiengani gimin an·tangni chakpaaniko parakatengon, an·tangtangni naljokgnina ia niamrangko manichina gita Shylla, a·doko songdongenggipa manderangko didiataha.
A·doko lockdown-ko ra·gattaina nanggenchimode gipin cholrangonikoba kajinarangko bikotna gita sorkari jotton ka·gen ineba Excise aro Revenue Minister parakataha.
“An·ching tangka paisa bang·eba janggian dongjagenchimode maming namgni dongjawa indiba an·chingo janggi dongkuenga ong·ode an·chingona tangka paisade sokbaaigen. Sorkarini ja·ku de·anirangara manderangni namgninan ong·enga,” ine Shylla aganaha.
