SHILLONG: Meghalaya a·dokoba COVID-19-ko man·giparang da·o batrorobataiengahani gimin a·dok sorkari, skulrangna on·enggipa sin·karini chuttiko re·baenggipa January 24 tarikona ra·dodapataha.
A·doko skulrangko re·anggipa December jani gittamgipa antionin chutti watahachim aro skulrangko re·baenggipa January 10 tarikon kulipilna siengachim.
Indake ong·engon, a·doko COVID-19-ko man·giparang da·o ka·sinsin batrorobataiengahani gimin sorkari, skulrango poraienggipa bi·sarangni namgnina skulrangna chutti on·aniko January 24 tarikona ra·dodapatna manchiangaha.
“Skulrangko January 10 tarikon kulipilani ong·engahachim indiba obostarang da·o namjabatna a·bachengtaiengahani gimin chinga skulrangko January 24 tarikona chutti watangkuna tik ka·aha,” ine a·dokni Education Minister Lahkmen Rymbui parakataha.
Meghalaya a·doko da·o COVID-19 man·giparang batrorobataiengani gimin batanggimin bilsirango gitan skul aro college-rangko chipe donattaigenma ine sing·on, iani bidingo Education department, skulni managing committee aro district administration-rangna u·iataniko on·manahani gimin uamangan nanga gita ja·kurangko de·angaigen ine Education Minister parakataha.
Manderangko naljoke rakkina gita sorkari pilak nanga kamrangko ka·engoba, sabisirang giproroahaode darangba champengna man·jaha ine janapatengon, mande sakantian an·tangtangko naljoke rakkina gita sorkarini dongimin niamrangko ja·rikna nanga aro tikarangko su·e ra·na nangchongmota ine Rymbui parakataha.
Bilsi 15-oni bilsi 18 ong·gipa chadamberangnaba da·o tikarangko su·na a·bachengahani gimin chatro chatrirangko aro ma·a paarangkoba ua tika su·e ra·china didiataha.
