\
TURA: Re·anggipa Budbar attamchibara, Garoland State Movement Committee (GSMC)-ni mitam dilgiparang, North Garo Hills a·jani Mendipathar petrol pump-ona re·ange tangkarangko dabiaha, petrol-rangko ra·e kataha aro pump-o kam ka·giparangko kragija dake dokenba petrol pump-ko chipataha ine matnangataha.
Ia a·selni bidingo koborko man·soa bakan North Garo Hills a·jani police-rang, dos dakgipa manderangko sandie mitam manderangkode rim·na man·aha.
Koborko on·ani gitade, ia a·sel ong·ani Mendipathar-o donggipa Super Energy Point petrol pump-o Budbar attamni 4:00 bajimango ong·aha.
Ia petrol pump-ni nokgipa Prakash Ch Momin-ni police-rangna FIR ka·ani gitade, Budbar attamo, AR-01DA 4889 Scorpio gisim gari, ML-08A 1456 Alto car aro Wagon R gari bolsa, adita bike-rang baksa petrol pump-ona re·angenba, petrol pump-o chi bringimin torangko palenga aro torangko komibate palenga ine matnangna a·bachengaha.
Ia manderang, an·tangtangko GSMC-ni co-chairman Balkarin Marak aro GSMC-ni sakgipin dilgipa Ryan Ch Marak ine aganenba, gipin bang·bea manderang baksa ia petrol pump-o kam ka·giparangko chadrapeaha. Ia manderangoni sakgittamde Assam a·dokoni ong·achim aro uamangoni saksade an·tangko Trelen Deka ine uamangna aganaha ineba FIR-o parakaha.
Deka-kode adita bilsirangna skangba, an·tangko oil company-ni mande ina dakmike Tura Hawakhana ka·mao donggipa SC Das petrol pump-oniko tangka dabiani gimin rim·ahachim ine kobor on·aha.
Mendipathar petrol pump-o ia manderangni litre 5 ong·gipa gallon-o torangko toe nion tik ong·e man·genchimoba, uamang petrol pump-o kam ka·giparangko cha·bokenga ine matnange, uamangni photo ka·giparangko social media-rango gipatna ka·mikkenataha.
Petrol pump-o to on·aniko toe nina gita supply aro legal metrology department-ni manderangko okamatchina gita petrol pump-o kam ka·giparang aganon, ia manderang ka·a ding·chaoe kam ka·giparangko dokna a·bachengaha aro kam ka·giparang kenjagokenba, ua biaponi kattokaha ineba FIR-o janapataha.
“Ja·mano ia manderang, petrol pump-ni chabiko ra·sekenba gong lak 20 tangkarangko on·china dabiaha indiba ia manderangna indita tangkarangko on·na jechakon uamang gong lak gniko on·skachina dabiaha. Petrol pump-o kam ka·giparang uamangna tangkarangko on·na man·jahaon uamang an·tangtangni gari aro bike-rango petrol-rangko gape ra·angskaaha aro petrol pump-ko chipe donangaha,” ine petrol pump-ni nokgipa, police-rangna badi ka·gipao parakataha.
Indake ong·engon, iani bidingo koborko man·soa bakan North Garo Hills a·jani police-rang, Mendipathar petrol pump-ona dariangaha aro ja·mano Scorpio gari baksana bike bolsako rim·e, dos dakgipa manderangoni sakbriko rim·na man·aha ine North Garo Hills a·jani SP Abraham T Sangma parakatskaaha.
Indake ong·genchimoba, GSMC-ni co-chairman Balkarin Marak, Ryan Marak, Trelen Deka aro pattoko donako man·gimin GNLA-ni gitcham membor Rahul Marak-kode rim·rikna man·jaha aro da·o uamangko sandiengkua ineba North Garo Hills a·jani SP parakataha.
