SHILLONG: Hynniewtrep National Liberation Council (HNLC) bobil dolni gitcham dilgipa Cheristerfield Thangkhiew-ko police-rangni so·otgipani bidingo Sukrobar salo skanggipa hearing-ko Meghalaya Human Rights Commission (MHRC)-ni Chairman Justice T Vaiphei, Shillong-o dakdilangaha.
Iani bidingo adita salrangna skangsan, Meghalaya Police, camera-o sianggipa mandeni nokdangko nangategija inquiry-ko dakchina mol·mole MHRC-na dorgastoko on·ahachim.
Indake ong·engon, camera-o inquiry-ko dakna a·dok sorkari bi·genchimode niamo on·na man·aia indiba camera-o inquiry-ko dakna gita sianggipa mandeni nokdangko galna ba ra·chapaniara sing·ani donga ine Vaiphei parakataha.
Vaiphei-ni parakatani gitade, Meghalaya police-ni mol·molani gita camera-o inquiry-ko dakna on·aha aro sianggipa mandeni nokdangni palo skia man·gipa ukil, nangchakegipa police officer-rang aro commission-ni officer-rangkosan inquiry-o bak ra·na ba MHRC-ni courtroom-o napna on·aigen.
A·dok sorkarini sakkirangko re·baenggipa January-ni 14 aro 15 tarikrango MHRC-ni gnigipa changna hearing-ko dakanio on·naba gnang ine ka·dongenga.
Inquiry-ko dakanio dingtang dingtang neng·nikanirangko chagrongna nanggenchimoba ua ta·raken inquiry-ko matchotatna miksongenga ineba MHRC-ni chairman parakataha.
Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katani ja·man ia a·selni bidingo judicial inquiry-ko dakchina Meghalaya sorkari ge·etangahachim.
Inquiry-ko dakna gita somoiko bi·dapani ja·man a·dok sorkari, ia inquiry committee-na re·anggipa bilsini November jaon jasa somoiko on·dapahachim.
