TURA: Ru·utgija sal somaio Congress-ko watgale TMC-o napgipa sak 11 GHADC MDC-rang, district-o niam gri koela salani bidingo North Garo Hills-ni Deputy Commissioner-na uni ta·rake aganpaaniko nangnike mijal Sonibar salo nangrime memorandum kingsako on·aha.
Deputy Commissioner R P Marak-na uamangni on·gipa memorandum-o district-o nilam ka·gimin koelarangko salna ge·etanirangko on·a nangchongmota ine MDC-rang aganaha.
“Sorkari official-ni hukum gita trak bolprako ton 9/12-ko salna hukum on·aniko janapaha. Maibakai hukum gita salgija trak garirang hukumna bate ton 20-na baten official-ni hukumko man·gija NG 62 gita salenga.
Ia niam gri koela gatprete salgipa trak garirang official-ni hukumrangko pe·enga uandake chingni district-ni kajina man·anirangko parak pasak ra·seke ra·a ga·akenga ine rongtalen nikna man·enga,” ia a·ning gamrangko palaoniko kam ka·giparangni man·a nanggipa dormaharangko on·a man·genchim ine memborrang aganaha.
Indake niam gri dakani kamrang GHADC-ni kajinako noksan ong·ata, indake noksan ong·dapgniko champengna man·a dipet senggnange ua mamlako ma·talatchina memborrang, Deputy Commissioner-ko didiaha. Niam gri koela salanirangko chek ka·china aro niam grigipa kamko chu·gimik dontongatna department-ni official-rangko ge·etanikoba memborrang nangnikaha.
