SHILLONG: Meghalaya sorkarini a·bachengo tik ka·sogimin gitan a·dokni bilsi 50 gapaniko manina siengon, ia manianiona a·songni Prime Minister Narendra Modi sokbajanaba dongaha ine a·dokni BJP dol parakataha.
Meghalaya a·dokoba Omicron man·giparang dongahaoba a·bachengo tik ka·gimin gitan a·dokni bilsi 50 gapaniko manianggen ine adita salrangna skangsan a·dokni Deputy Chief Minister Prestone Tynsong parakatahachim.
A·dokni bilsi 50 gapaniko manianiona a·songni Prime Minister Narendra Modi-koba re·bae bak ra·echina gita a·dok sorkari okamatahachim.
Indake ong·genchimoba, da·onan Prime Minister-ni re·bagnini gimin PMO-oni Meghalaya a·dokna maming u·iatanirang dongkujaengani gimin ua sokbana man·jawahakon ine BJP-ni state president Ernest Mawrie, kobor ra·timgiparangna parakataha.
“Pangnande Prime Minister gita dakgipa dal·dalgipa manderangni re·bana skangan u·iatsamsoanirangko dakachim indiba da·ona kingkingan uni re·bagnini bidingo maming u·iataniranko man·soa dongkujaenga,” ine Mawrie aganaha.
Meghalaya a·doko COVID-19-ni Omicron rokomko man·giparang dongahaoba a·dokni bilsi 50 gapaniko donsogimin somoi gitan maniangaigen indiba a·dokni bilsi 50 gapaniko manina tarisogimin program-rangko sorkari mikkang antio nipilangtaigen ine adita salrangna skangsan, a·dokni Deputy Chief Minister Prestone Tynsong parakatahachim.
Deputy Chief Minister-ni parakatani gitade, ia manianiko sorkari dontongatpiljagenchimoba program-rangko adita dingtangatnaba gnang aro manderangni tom·chimonganirangko komiatna nangnaba gnang.
