TURA: Re·anggipa Sonibar salo, Nokma Council-ni chang 17-gipa annual conference ba bilsini tom·bimonganiko Dadenggre-o ong·atangaha aro ia tom·bimonganiko ong·atanio Garo Hills gimikni nokma sanerang re·bae bakko ra·angtokaha.
Ia tom·bimonganiko ong·atanio a·dokni Chief Minister Conrad Sangma, mongsonggipa sokgipa ong·e bakko ra·angaha aro tom·anio Nokma Council-ni memorandum-ko Chief Minister-na on·atjolaha.
Gam-jinrangni kosako nokgipa ong·na gita Panchayati Raj Ministry-ni ning·o ma·mong sorkarini ra·gatgipa Svamitva Scheme-ko Meghalaya a·doko aro mongsongbate Garo Hills-o ra·gatgenchimode ian Nokmarangna on·gimin bilko pe·gnok aro nokmarangni bil komignok ine Nokma Council, ia scheme-ko Meghalaya a·dokode ra·chakjachina gita memorandum-o a·dokni Chief Minister-ko didiataha.
Garo Hills-ni songantion village employment council (VEC)-rangko songani bidingo janapatskaengon, sorkarini dongimin niam gitade a·king Nokmarangsa VEC-ni chairman ong·na gita nangachim indiba bang·bata songrangon chairman-ko skatangsa songe kamko ka·engani a·sel nokmarangde maming bilko man·pajaenga ine Nokma Council, sorkarini dongimin niam gitan nokmarangko VEC-ni chairman songchina Chief Minister-ko didiataha.
India sorkarini gita maming u·iatchengani gri kejur bolrangko ge·drana miksongenga ineba Nokma Council-ni memorandum-o janapatengon, ia kejur bolrangara Garo Hills-o ge·genchimode pilakni gitan rusiani kamsa ong·aigen ine nokmarang raken jegalataha aro a·doko kejur ge·aniko ra·chakjachina Chief Minister-ko didiataha.
Iana agreba Garo Hills-o Village Council-ko songna sienganiara Garo Hills-o nokmarangna on·gimin bilko pe·ani gita ong·gen ine Nokma Council, ia village council-ni giminba Chief Minister-na badi ka·doataha.
Indake ong·engon, A·chik a·songo donggipa buring bolgrimrangko aro chiring chibisikrangko ripinge rakkina gita tangka paisarangko on·e dakchakchina gitaba Nokma Council, a·dokni Chief Minister-ko mol·molataha.
Ia tom·bimonganio a·dokni Chief Minister-ba jinmana aganprakengon, India sorkarini kejur bolrangko ge·drana miksongenga ine nokmarangni kenchakenggipana aganchakaniko on·angenba, a·doko maming dakeba samtangtango ong·telaigiparangna nangchakeaniko ra·banagipa kejur bolrangko ge·drana on·jawa ine ku·rachakaniko on·angaha.
Jatni daka rikaniko ripingna kam ka·anio ua nokmarangna pilak nanga dakchakanirangko on·na gitaba ku·rachakaniko on·angaha.
Ia tom·bimonganio ua, Garo Hills-ni dingtang dingtang songrango Nokma Kacharirangko rikna gita gong kror 1.45-ni cheque-ko Nokma Council-ni president SG Momin-na pakwate on·angjolaha.
