TURA: Garo Hills Autonomous District Council (GHADC)-ni ning·o village council-ko ra·gataniara GHADC-ni bilko aro a·king nokmarangna on·gimin bilko pe·ani gita ong·gen ine Niksamso A·chik Society (NAS) parakatenba, Garo Hills-o village council-ko ra·gatna skang, GHADC-na dingtang electoral roll-ko tarichina gita dabiangaha.
NAS dolni parakatani gitade, GHADC-ara Garo Hills-o songdongenggipa Tribal-rangna aro mongsongbate A·chikrangna on·gimin bimangsa ong·ani gimin skangonin A·chik NGO-rang, GHADC-o gipin jatrangni bak ra·paaniko champengchina aro dingtang electoral roll-ko tarichina dabitokengachim.
“Garo Hills-ni plain belt jolrango skangonin gipin jatrang napdrae songdong a·chaabaanichi da·o bang·bata biaprangon gipin jatrangsa bang·batengaha aro da·o apsan daken GHADC-o gipin jatrangkoba bak ra·na on·angkuaigenchimode mikkangchi ia jolrango A·chikrangni a·a-chiarang gimaangkugen ine nikesa chinga GHADC-o gipin jatrang bak ra·na man·jaha gita dingtang electoral roll-ko jakkalchina dabienga,” ine NAS-ni dilgiparang parakataha.
A·chik a·songo village council-ko ra·gatna skangba GHADC-o gipin jatrang bak ra·pana man·jana gita dingtang electoral roll-ko tarichengna nanggen ineba NAS dabiangaha.
“A·chik a·songo A·chik jatni niam bidikko ma·sigijagipa gipin jatrang maming dakeba songko nokko dilna gita krachongmotja. Uni gimin GHADC-o A·chikrangan bilgnange jatko aro a·songko dilgiparang ong·na nanga. GHADC-o dingtang electoral roll-ko jakkaljagenchimode gipin jatrangni bak ra·aniko champengna man·jawa, uni gimin village council-ko ra·gatna skangan GHADC-o dingtang electoral roll-ko tarichengna nanggen,” ine NAS-ni dilgiparang parakataha.