TURA: Tura-ni Directorate of Information & Public Relations (DIPR) office-ona dakanggipa rama namsrangjaengahani gimin ia ramako bakan tarignok ine West Garo Hills a·jani Deputy Commissioner Ram Singh u·iataha.
Ia ramara Tura-ni Dakkopgre jolo donggipa rama ong·a aro ian DIPR office-onasan ong·aigija Excise, Eco Development Society, Kendriya Vidyalaya-ni staff quarter-rang, DIPR-ni quarter-rang, MePDCL-ni warehouse, CRPF quarantine centre aro uandakgipa sorkari nokrang baksana jolo songdongenggipa manderangni nokrangona dakanggipa ramaba ong·achim.
Jolo songdongenggipa manderangni u·iatani gitade, ia ramako tarigija galchipe donani da·o bilsi 10-mang gapna sipilengahachim indiba ia ramara sorkari office-rangona dakanggipa rama ong·ani gimin darangba ia ramani bidingo badi ka·giparang dongkujaengachim.
Ia ramani bakroania metre 400-mangsan ong·aiachim aro ian PA Sangma Stadium-ni sambao donggipa ramaba ong·achim.
“Ia rama namsrangjahani a·sel wachini somoirangode chirang joksrubae manderang re·a doanirango neng·nikanirangko man·tokna nangengaha. Ia rama namen apchonbea aro mikkarang waahaode rimilenba gari aro manderang re·na man·srangjaha. Uni gimin ia ramako chinga ta·raken tarie on·china nangnikengachim,” ine jolo songdongenggipa manderang aganaha.
Ia ramako tarigija galchipe donengani gimin sing·sandiaton, ia ramako tarina gita Chief Minister-ni NDB scheme-ni ning·o tangka paisarangko chamanaha aro bakan kamrangko a·bachengatgnok ine West Garo Hills a·jani Deputy Commissioner Ram Singh parakataha.
Ia biaprangara South Tura constituency-ni ning·o ga·akgipa biaprang ong·achim ineba nikna man·a.
