TURA: Tura jillani Nakam Bazar-o donggipa chu dokkanni manager-ko kragija dake dokani gimin Sukrobar salo police-rang, mande sakgniko rim·aha ine kobor on·aha.
Re·anggipa January-ni 18 tarik attamni 7:45 bajimango, Nakam Bazar-o donggipa chu dokkanni manager saksako mande sakgni, chu dabie man·jahani gimin kragija dake dokahachim.
Ia a·sel ong·ani ja·mano dokako man·gipa mande police-rangna FIR ka·doangaha aro uandaken police-rang, dos dakgipa mande sakgniko Sukrobar pringo rim·na man·aha ine u·iataha.
Ia chu dokkanni licence-ara saksa Carnolia Sangma minggipa mandeni bimingo ong·achim aro manager-ni FIR-o parakani gitade, January 18 tarik attamni 4:30 bajimango, chadambe sakgni, AS-01 1896 motorcycle-o Nakam Bazar-o donggipa chu dokkanona re·bae, chu te·sako tangka gamgija ra·e katangahachim. Ja·mano uamang ia apsan dokkanonan re·bataie ia dokkanoniko chuko dabitaiahachim indiba dokkan manager-ni uamangna chuko on·na jechakon, uamang kragija dake ia manager-ko dokahachim.
Ia manderangni chadrapaniko man·e ia dokkanni manager, gingting bretna nangahachim.
Indake ong·engon, ia manager-ni FIR-ko man·soani ja·man police-rang, dos dakgipa manderangko sandina a·bachengaha aro uandaken dos dakgipa mande sakgniko Sukrobar pringon rim·na man·aha ine West Garo Hills a·jani SP parakataha.
