SHILLONG: Re·anggipa Sukrobar salo, Meghalaya a·dok gimikon a·dokni bilsi 50 gapaniko kusi ong·e manitokengon, SSA skulrango skigiparangde jagittamni dormaharangko man·tokkujaengani gimin Shillong songjinmani Khyndailad-o nisan gisimko ra·e aro mombatirangko so·e sorkarini kosako jingjengataniko dakangskaaha.
Ia jingjengataniko Meghalaya SSA Schools Association (MSSASA) dakdilangaha aro SSA skulrango skigiparangna jagittamni dormaharangko ta·raken on·jagenchimode sorkarini kosako bilakbate jingjengatna gitaba manchie donangaha.
MSSASA-ni president Aristotle Rymbai-ni kobor ra·timgiparangna parakatani gitade, uamangni Right To Information (RTI) ka·anio pangchake, re·anggipa bilsini November 9 tariko gong kror 59.34 tangkarangko aro December 22 tarikoba gong kror 73.51 tangkarangko ma·mong sorkari, SSA scheme-ni ning·o Meghalaya a·dokna chamataha ine uamang ma·sina man·ahachim indiba gong kror 52 tangkarangkosan a·doko man·soaiaha ine a·dokni Education Minister Lahkmen Rymbui-de a·kangskaengachim.
“Chingni Education Ministry-o RTI ka·e man·gipa aro Education Minister-ni agangipa tangkarang meligrikjahani gimin chinga namen aiao inmanbeaha,” ine MSSASA-ni president aganaha.
Ma·mong sorkarionin Meghalaya a·dokna tangka paisarangko chame on·atmanaha ong·ode maini gimin a·dok sorkari, SSA skulrango skigiparangni dormaharangko on·na man·jaenga ineba Rymbai sing·doangaha.
“Gong kror 104 tangkarangko watchipjaengani giminsa chinga sorkarini kosako jegale jingjengatanirangko dakenga. Samagra Shiksha-ni niamrango pangchake 10 percent-kode a·dok sorkari chapna nanga aro batanggimin bilsi gittamna kingking ia tangkarangko a·dok sorkari watchipkujaenga,” ine Rymbai aganaha.
Rymbai-ni parakatani gitade, ia gong kror 104 tangkarangchi SSA skulrango skigiparangna jagittamni dormaharangko on·na chu·ongaigenchim.
SSA skigiparangko kamo regularise ka·kujaengani gimin uamang, High Court-o badi ka·na miksongenga ineba MSSASA-ni president parakataha.
