SHILLONG: All India Trinamool Congress (AITC), mikkang jani gisepon party-ni chu·gimik kamrang jekai state unit-ko songa ba uandakgipa kamrangko matchotatna jotton ka·enga. Beben party, batanggimin jagni skangan a·dokona napaha indiba state unit-ko da·onaba songa dongkujaenga.
Meghalaya-o AITC, Krismasna skang state unit-ko songna tik ka·ahachim indiba party-ni dilgiparang, da·ora mikkang jaona state unit-ko songna somoiko donskaha.
AITC-ni state president Charles Pyngrope, mni Sonibar salo kobor ra·timgiparang baksa agangrikmitingo indine aganaha, “party-ni gimin memborrangan kamo jakchakgija ong·tokenga uni gimin kamrangko ta·rake ka·na man·jaha aro state unit-ko songna man·kujaenga. Ning·in ning·inde chinga unit-ko songaha, state coordination cimmittee-ba dongjok, ta·raken officially parakatgen.”
Iarangni gisepon dingtang dingtang constituency-rango party block-ko songna a·bachengataha, ine parakatengba, AITC Meghalaya-ni chief, “AITC-ko a·doko ra·chakjawa’ ine agangipa kattako kakket ong·ja ine talataha. Kakketko agangenchimode bang·arangan party-o napna sikaniko parakaha, ineba aganaha.
Uandake Khasi Hills a·jao party-ko ra·chaka ba ra·chakjani bidingo sing·anina Charles, indine aganchakaha, “Chingni party-ona re·bana sikgiparang bang·a indiba uamangko champengrikgipaba dongksaa, niatgenchimode, jinma manderangoniko namnike ra·chakaniko nikna man·enga.”
