SHILLONG: Shillong songjinmani wilwilao donggipa skulrangode class I-oni class XII-ona online gitasa class-rangko ra·e gipin biaprangode skulrangko class I-oni class XII-onan kulipiltaina manchiangahaon, a·doko ong·enga obostarangko niroke skulrangko kulianggen ine a·dokni Education Minister Lahkmen Rymbui parakataha.
Iani bidingo kobor ra·timgiparangna talataniko on·angengon, da·o dipet Shillong songjinmani wilwilaode skulrangko class I-oni class XII-ona kingking online gita class-rangko ra·na aro gipin biaprangode class I-oni class XII-ona kingking skulrangko kulipiltaina gita Sombar salo Education department u·iataniko on·manaha ine Mongolbar salo, Rymbui parakataha.
“Indiba Shillong-ni wilwilao donggipa skulrangkoba chu·gimik kulina chinga salsa salgnini gisepon obostarangko nipilanggen aro anga ka·donga chinga bakan skulrangko chu·gimik kulina man·gnok,” ine Rymbui aganaha.
Education Minister-ni parakatani gitade, MBOSE-ni SSLC aro HSSLC porikkarangkode dongimin somoi gitan ong·atangaigen.